Манастир „Света Недела“, село Стровија

Манастир „Света Недела“, село Стровија

Темелите за манастирската црква „Света Недела“ во селото Стровија се осветени на 28 април 1968 година, на Томина недела. Темелите ги осветил протоереј-ставрофор Борис Талески, со благослов на Митрополитот Преспанско-битолски Климент. Црквата, пак, осветена е на 2 мај 1976 година. Чинот на осветувањето го изврши Пелагонискиот епископ Ангелариј.

Новоосветените темели на црквата се сметаат за остатоци од стара манастирска црква, посветен на истата великомаченичка, за кој нема податоци кога е урнат, но сигурно во почетокот на Османлиското ропство. Остатоците од древната црква, која се наоѓала покрај брегот на тогаш бујната Стровиска река, денес можат да се лоцираат во низините, така што денес од неа е загубена секаква трага. Единствено нешто, кое асоцира на дамнешните времиња, е една мала чешма, на чија вода се припишува чудотворно дејство и носи име по манастирската црква.