Бело Поле

Бело Поле

Бело Поле е село во Прилепското поле, кое се наоѓа северозападно од Прилеп.

Во атарот на Бело Поле, во месноста „Висои“, има населба од бронзената и доцноантичката епоха; во месноста „Марков чардак“ има населба од елинистичката, доцноантичката и средновековната епоха, со остатоци од градби на куќи и цистерни; во месностите „До селото“ и „Чачорица“ има римски населби; во месноста „Свети Никола“ има наоди од римско време, а во месноста „Манастириште“ има остатоци од средновековна црква.

Во XIX век Бело Поле било село во Прилепската каза на Османлиската империја. Во „Етнографија на вилаетите Адрианопол, Монастир и Салоника“, издадена во Константинопол во 1878 година и во која е дадена статистиката на машкото население од 1873 година, Бело Поле (Bélopolé) е посочено како село со 21 домаќинства и 94 жители христијани. Според статистиката на Васил К’нчов („Македонија: Етнографија и статистика“) од 1900 година, селото е населено од 150 жители христијани.

Во почетокот на ХХ век, христијаните во селото биле под управа на Бугарската егзархија. Според податоците на секретарот на Егзархијата Димитар Мишев („La Macédoine et sa Population Chrétienne“), во 1905 година во Бело поле (Belo-Polé) имало 120 егзархисти.

При избувнувањето на Балканската војна, петмина од Бело Поле биле доброволци во Македонско-одринската доброволна чета.

Нема Коментари

Коментирај

© 2011/12 dbmc